So, meine Vorleseschulden eingelöst ... und Nadi hat nichtmal gelacht
SießholzMa ganz ährlisch - isch hab nischd geeschn vorliebde junge Leide... mor is ja schließlisch ooch ma jung gewähsn! - abor isch kanns nisch leidn, wenn isch zuguggn muss, wie die sisch gnudschn dun un sisch umärmln, dass de Angsd ham mussd, die kenndn jedn Momend in de Horrizondale ieborgehn! Das is mir irschenwie beinlisch.
Noch beinlischor wirds mir abor, wenn nisch mähr junge Vorliebde effendlisch rumdurdln dun. Womeeschlisch welsche, die schon nahe an dor Grenze zur Rende sin odor driebor. Nisch, dass isch dähnen das nisch genn due - nee, abor isch will nisch zuguggn missn! Un wenn nu grade in dor Gasdschdädde sisch welsche genau dir geeschniebor hinsedzn dun... na, da kannsde ooch schleschd wegguggn. Immor bloß an de Degge guggn, da grischsde ja Geniggschdachl. Zum Gligg hadde isch eene Zeidung dabei. Da habsch nu indensief neingeguggd, um das Dheador driehm am Disch geeschniebor nisch anguggn zu missn. Am Ende, wo die dann endlisch widdor gegang sin, habsch die Zeidung auswendisch gekonnd!
Abhaun konnde isch abor ooch nisch, weil isch ja off meine Gudste wardn mussde, die misch in dor Gasdschdädde abgesedzd hadde, weilse in Ruhe was einkoofn wollde. Isch däde immor so drängeln. Alleene hädde se viel mähr Genuss am Einkoofn! Ogeh, eh isch misch schlachn lass, sedz isch misch in de Gasdschdädde un drink e Bierschn - odor zweeje - un warde bis meine Gudste ihrn Koofrausch ausgelähbd had. Isch konnde ja nisch ahnen, was das Schigsahl sisch fiehr eene Briefung fiehr misch ausgedachd hadde. Ehm e sähr schbädes Liebesbaar - direggd mir geeschniebor!
Un dähr alde Kerl had gesäusld...ja, Schadz... bidde Schadz... un meschdesd du was drinkn, Liebes... Schadz schau mal... ach, Liebes... nein, wirglisch mein Engel... ach, Schadz...
Mir is ährlisch beinahe dor Gaffee vom Friehschdigg hochgekomm. Soviel Schmalz vordraach isch eenfach nisch! Vorsischdshalbor habsch mir gleisch ma noch een Maachnbiddor beschdelld. Dor Schadz had nisch viel gesachd, abor immor sähr gligglisch geguggd un faldnreisch geläschld! Se hadde iebrischens so dreggschblonde lange Haare un eene graue Schdriggjagge an. Dazu war se ziehmlisch vorschnubbd un had dauornd dähn Rodz so hochgeschniefd. Un een Busn hadse gehabbd wie eene Amme, die Drillinge vorsorschn muss. Dor Galahn hadde eene Drachdnjagge an un had sähr Hochdeudsch gereded. So e bißl ieborkandiedld! So falsch!
Dass die das nisch rausgeheerd had, dass der bloß Sießholz raschbln dad...?! Bloß hohle Flosgln!? Isch hab das zähn Medor geeschn dähn Wind rausgeheerd! Ohne hinguggn!
Nee, ährlisch - da bin isch annersch! Wenn isch zu meinor Gudstn ma saache... du dumme Kuh! - dann is das dodahl ährlisch gemeend un kommd eschd vom Härzn!
Eduard Sachsenmeyer